DILI: Advogadu hosi Portugal sadik Ministériu Públiku atu
kondena Xanana Gusmão ne’ebé sai hanesan Xefe Governu bainhira kazu eis
Ministra Finansas Emilia Pires no Eis Vise Ministra Saúde, Madalena Hanjam
akontese.
Advogadu Nuno Morais konfuzaun ho
akuzasaun husi Ministériu Públiku (MP) hasoru arguida Emilia no Madalena, tanba
de’it kontratu ne’ebé la tau naran kompaña nian.
“Ne'e sufisiente? Ha'u hanoin lae
karik," deklara Nuno durante julgamentu ba kazu Emilia-Madalena iha
Tribunál Distrital Dili, Kinta (22/09).
Nuno dehan, MP akuza arguida na’in
rua ne'e hanesan fali sira mak iha poder boot liu iha governu hodi foti
desizaun ba orsamentu estadu nian.
Nia esplika, Ministra Finansas atu
jere de’it orsamentu estadu, la'ós atu deside. Primeiru Ministru mak iha
direitu atu foti desizaun.
Tan ne’e, defensór ne’e husu ba MP
atu kondena mós eis Primeiru Ministru Xanana Gusmão, la'ós kondena fali arguida
Emilia-Madalena.
“Ida ne'e mak hatudu katak, sistema
judisiaria iha Timor-Leste, liuliu iha MP nia laran la hatene servisu. Ita-boot
sira maestradu, hatudu ita-boot sira-nia profesionalizmu atu estuda kazu ne'e ho
didi’ak. Iha failansu barak mak ita-boot sira halo kona-ba kazu ne'e,"
katak Nuno.
Advogadu hosi Portugal ne’e dehan,
durante nia hala’o kareira iha nasaun barak, foin ba dahuluk nia hasoru kazu
hanesan ne’e iha Timor-Leste. "Ita-boot sira kondena ema na’in rua ne'e
(Emilia-Madalena) ho faktus ne’ebé la sufisiente. Ita-boot bele brani halo ida
ne'e," sadik advogadu ne’e.
Hamonu Kredibilidade
Iha fatin hanesan, Prokuradóra
Angelina Saldanha lamenta no konsidera advogadu husi Portugal ne’e hamonu
kredibilidade justisa TL.
Angelina husu ba defensór Portugal
ne'e, atu hala’o funsaun nu'udar advogadu ba kliente la'ós atu hamonu TL
nia soberanu.
"Ami
nia pais ne'e soberanu, la'ós mai atu kondena. Ita mai iha tribunal ne'e tanba
akuzasaun. Tanba hakarak hetan provas ne'e mak ita mai iha tribunal ne'e,"
katak prokuradóra ne’e. (*)
Sources: Olatimornews.com
0 thoughts on “Advogadu Portugal Sadik MP Kondena Xanana”