Estudante Bolseiru Mocambique Hili Hahan Foer, Abel: Hatun Nia Aan Rasik, Tanba Nia Sempre Atraza Iha Relatoriu

DILI-Estudante bolseiru iha Mocambique neebe mak deskonfia hili hahan for hodi hetan osan, ida nee nia rasik hatun nia aan, tanba kada fulan nia atraza relatoriu hatama ba Ministeriu Edukasaun kona ba gastu osan.

Tuir Vice Ministru ME Abel Ximenes katak, estudante bolseiru ida iha Mocambique iha facebook nia kesi tiha Bandeira RDTL iha ulun, depois ba buka hahan iha lixu atu hodi hetan osan, estudante nee naran Januario i nia nee ema ida lider politika neebe nia halo pozisaun nee atu hodi poletiza tiha situasaun nee.

Nia hatete, osan ba nia nee laos laiha, osan iha hela so ke nia lahatama relatoriu nee mak osan ba nia mos atraza, neebe nia tenke rekonese nia direitu no dever. Maibe ba estudante sira seluk hatama relatoriu lancar no sira simu osan mos lancar.  Estudante halo hahalok ida nee hatudu imajem ba nia aan katak nia nee laos ema intelektual ida, maibe nia rasik halo hodi hatun nia aan, no hatun nia imajen hanesan estudante bolseiru.

Nunee mos Reitor Cristal Sebastiao Pereira hanesan parte Akademika hatete, iha informasaun dehan katak deskonfia estudante ida hili hahan foer ba lori hetan osan nee, ida nee hanoin orsamentu neebe transfere ba sira nee konsentralizadu iha governu prosesu ba iha nasional nee mak dala ruma atraza. Husu ba inan aman sira mos oinsa mak atu haree ba ona sira bele fo apoiu, karik osan ba oan sira atraza inan aman sira bele apoiu hodi hein osan husi governu. Informasaun kompletu iha STL Jornal no STL Web, edisaun Kinta (13/10/2016). Guilhermina Franco / Jacinta Sequeira