Home Ambiente , Slider Kada Tinan, Timor Leste Lakon Ikan Miloens 200

Kada Tinan, Timor Leste Lakon Ikan Miloens 200

By realidade timor Tuesday, October 18, 2016 Ambiente , Slider

DILI—Vise Ministru Agrikultura no Peskas, Marcos da Cruz hatete, kada tinan Timor Leste lakon ikan kuaze biloens 200 iha Tasi Timor, problema ne’e akontese tanba Timor Leste seidauk iha kondisaun di’ak atu kontrola tasi hosi peskador ilegál.

Marcos hatete, dau-daun ne’e ró peska ilegál kontinua halo operasaun iha tasi Timor kosta sul, maibé to’o oras ne’e governu seidauk másimu atu halo kontrolu tanba kondisaun sei mínimu.

“Ema hotu tau preokupasaun ba ró ilegál buras iha ita nia rain, maibé ita seidauk iha kondisaun atu kontrolu ba ró sira ne’e liu-liu parte kosta sul ninian, ita seidauk bele detekta ró sira ne’e, ita haree de’it katak kada tinan ita lakon ita nia ikan kuaze 200 miloens,” informa Marcos iha nia servisu fatin, Komoro, Segunda, (17/10).

Alende ikan iha mós Riku soin seluk hanesan Lenuk, no bio-diversidade sira seluk ne’ebé maka fo valór ekonomia ba nasaun Timor Leste.

Vise Ministru haktuir, ró sira ne’ebé maka mai halo peska ilegál ne’e deskonfia maioria mai hosi nasaun vijiñu, maibé governu sedauk detekta lolo’os ba ró sira ne’ebé maka halo operasaun peskas iha tasi Timor.

“Agora ne’e kalkula de’it teoria ne’e maka iha katak kuaze ita nia ikan barak mak lakon maibé ita mos seidauk hatene iha tan bio-diversidade balu maka lakon tan, hanesan mos Lenuk, maibé problema maka ita seidauk iha meus ida oinsa ita bele detekta buat sira ne’e. kaer ró ilegál sira ne’e” tenik nia.

Maske nune’e, Marcos Afirma, governu sei buka meius ida ne’ebé maka diak, hodi esforsu an,atu halo koperasaun ho nasaun Vijinu rua hanesan Australi ho Indonézia atu bele servisu di’ak liutan hodi kontrola ró ilegál ne’ebé maka sirkula iha tasi Timor.

Marcos mós husu ba Governu hosi nasun rua ne’e atu kontrola sira nia roo sira ne’ebé maka mai sirkula no halo operasaun iha tasi Timor.

“Husu ba nasaun idak-idak tenke kontrola nia ró sira ne’e, katak bainhira sira atu mai halo operasaun iha ita nia area tenke iha lisensamentu nune’e bele fo benefisiu ba povu Timor la’os lori fali ba sira nia rain,”marcos husu. (jxy)

Sources : Timor Post

TAG Ambiente Slider